將理財融入生活 李紫晶

0
130

「你至精!你至精!」長期客仔老編大哥一路走入咖啡室,一路叫我嘅花名,究竟何事?「李至精,我想搵你寫個理財專欄。」老編真係識得乜嘢叫老實不客氣。

老編繼續講 :「你呢間咖啡店平時咁多金融才俊出入,耳濡目染,你嘅理財觸覺咁好,識得喺5月股市大跌前出晒股票,又响年頭同我講要趁高價賣樓,平時做咁多理財,好應該同讀者分享吓!」

老編果然有慧眼!原來係睇中我啲客仔。無錯!自從開咗咖啡店後,我經常同客吹水,試吓唔同嘅理財產品,漸漸將生活融入理財,理財融入生活,荷包比以前打工漲咗唔少,如果將呢種理財生活方式同讀者分享,不失為一件美事!

一講理財,不得不提最近鬥到火紅嘅稅貸,昨日銀行經理小譚走嚟推銷稅貸,24個月稅貸月平息低到0.101%,年息2.34%,意味借100元每年還102.34元,10萬元每月本息共還$4,270。

息口咁抵搞到我心郁郁,但送上門嘅嘢永遠唔值錢,所以我作吓狀,歎口Cappuccino先話:「咁平又點啫!借咗啲錢都冇用,唔通攞嚟炒股票,你估包贏咩!蝕咗實畀我老公小勇哥煎咗層皮」。

雖然咁講,但小譚都冇畀我激到,仲偷偷同我講,佢自己都借盡稅貸嚟投資,比炒股票安全好多,有8厘回報,減咗還畀銀行嘅2.34厘,自己仲有5厘幾落袋。究竟係乜?下星期話你知。

讀者評論

發表留言