女士離婚都要計數 溫敏妮

0
36

冬大過年,每年一班親戚朋友會趁呢個機會聚會。敏妮今年參加好朋友嘅家族聚會,大家族認真唔講得笑,普通食飯都筵開幾席。朋友仲話,有啲表兄弟姊妹唔得閒,否則場面仲墟冚。

席間朋友同佢表妹竊竊私語,原來佢哋講緊一位阿姨近排搵咗問卜師傅,問吓好唔好同老公離婚。聽好朋友講,呢位姨丈係做生意,但開親舖都執,好在有個有錢哥哥不斷關照。

姨丈生意做唔成,但就外遇不斷,阿姨一早知道老公有小三,但當時囝囝仲讀緊書,所以一直啞忍。阿姨自己投資有道,儲埋唔少私己,呢幾年囝囝唔單止學有所成,仲喺投資大行做,所以阿姨就萌生離婚念頭。

相信唔少朋友聽到呢度,都想知師傅有乜啟示,師傅話多一事不如少一事,叫阿姨諗清楚。敏妮唔知呢位師傅求神問卜方面幾厲害,但肯定呢位師傅幾心水清。姨丈 表面風光全靠哥哥,相反阿姨淨係用私己錢都買咗幾層樓,離婚分身家,隨時阿姨分畀姨丈。據朋友講,阿姨曾經諗過將財產轉畀囝囝,但一諗到錢都係自己最靠得 住,即刻打消念頭。

其實,離婚點分身家,要睇離婚法庭點判。法庭考慮雙方喺金錢上對家庭付出有幾多,例如物業由邊個畀首期、律師費、釐印費同邊個負責供樓,法庭亦考慮埋非金 錢嘅付出,例如全職媽媽/爸爸,放棄工作留喺屋企湊小朋友。當然亦考慮雙方各自嘅入息、賺錢能力、財產來源等。俗語話,清官難審家庭事,敏妮希望人人家和 萬事興。

讀者評論

發表留言