加按買年金 自住又收租 李紫晶

0
46

上周講到蘇小姐睇淡樓市但又唔想賣樓,問安格斯有冇好橋。安格斯果然有料,提供咗多個方案。

佢話:「第一步你將物業轉按,套一筆錢來投資,依家樓按得兩厘,只要套出來嘅錢有5、6厘回報以上,都值得考慮,重點係選擇投資時,要保本同埋顧及未來加息嘅因素。」

我插嘴:「係呀,係呀!一定要保本呀!好似高太舊年賣咗自住層樓,套咗300萬炒股,點知年中股災,蝕剩100萬,依家樓價回咗啲,但未去番放樓時嘅價位,每月又要交租,真係幾大鑊!」

蘇小姐好心急咁講:「我層樓依家值400萬,仲有50萬未還,做六成按揭,可以套現230萬,究竟有乜好做呢?」

安格斯話:「你可以做保險年金,按揭支出每年2厘,年金每年可收7至8厘,牌面上有利可圖。你層樓加按後月供8,800元,可以設計到由年金代供,呢個可要同保險公司傾,由佢哋保證。」

佢補充:「年金嘅精粹係盡量任由資金本息滾存,愈遲攞錢,增值愈高,其間除咗供樓用嘅錢外,最好不要攞分紅,10年後你仍然唔使供樓,仲可以開始每月攞分紅,估計有7,000元左右,直至計劃完結為止。好似租咗層樓出去收租,但自己又住番」。

蘇小姐同我都覺得,層樓反正一路住落去,如果每月多幾千蚊使,梗係諗得過啦!但安格斯話,佢有幾個方案,一於聽埋先再考慮。

讀者評論

發表留言