教子女富在起跑線 溫敏妮

0
32

怪獸家長希望子女贏在起跑線,不斷進「補」,結果養肥一班補習天王。敏妮有朋友更大貪,希望兩個仔「富在起跑線」!朋友是賓架一名,兩兒子不至於含着銀匙出世,但都衣食豐足。不過,賓架心目中的「富在起跑線」,並非為兒子累積大量財富,而是身體力行,教兒子「金錢之道」。

佢首先教嘅唔係囝囝,而係身邊人。賓架不斷向愛妻灌輸理財之道,在網上搜尋各地投資名宿教導下一代理財的資料。朋友嘅Facebook經常分享《投資大師 羅傑斯給寶貝女兒的12封信》、《摩根家書:財富巨擘給兒子的32封信》呢啲書。佢有次share的文章講各國人民如何教子女理財,相當有趣。

美國政府唔夠錢使時,只係識印銀紙或者舉債,搞到債台高築,但美國父母一早教子女認識自立、勤奮同金錢嘅關係,鼓勵孩子從小工作賺錢。美國人將自己唔需要嘅嘢拍賣,小朋友亦將唔玩嘅玩具,放喺門口出售,幫補零用。

至於日本人,主張孩子自力更生,自己管理零用錢。日本父母鼓勵孩子透過勞動獲得回報,所以唔少日本學生課餘時,亦做兼職賺零用。

最識做生意同理財嘅猶太人,更加係自小注重財富教育。猶太父母送股票畀滿月嘅子女,子女3歲時教佢哋辨認硬幣同紙幣、5歲時知道錢可以買想要嘅嘢,同埋錢係點嚟、7歲知道點睇價格標籤、8歲識打工賺錢同存錢入銀行、10歲識得節儉嘅道理。

反觀香港,敏妮相信,唔少父母自己要學理財,有幾多好似賓架朋友咁,教子女理財呢?

讀者評論

發表留言