加按物業賺息10厘妙法 李紫晶

0
74

唔想賣樓又想享受樓宇升值嘅好處?安格斯介紹完保險年金方案後,歎口咖啡講另一種方法,「第一步同樣將物業轉按套現,但今次唔做保險年金,而係買債券」。

安格斯怕我同蘇小姐唔識乜嘢係債券,耐心教導:「債券由政府或企業發行,應承向投資者支付議定的利息,派息可分按月、按季、半年或按年,在到期日償還本金」。

「因為加按套出來的錢,唔想冒高風險,所以揀一啲優質債券,評級BBB以上,年期5年左右,息口比短債同政府債高啲,最少半年派一次息,方便將收到嘅息用來供樓,同時要買美元債券,減低匯率風險。債息要求5至6厘,如2022年到期的東亞銀行債券孳息都有6厘」。

安格斯見我同蘇小姐攞支筆猛抄筆記,有點啼笑皆非,仲戲謔:「兩位同學,依家講重點啦!這類債券風險不高,投資者可將債券抵押,借錢來投資,最多借到本金八成,借貸年息2厘左右。睇住自己承受風險能力先至好借錢,加碼這類債券的目標係要提高回報到8至10厘」。

佢繼續:「依家計吓數,如果用100萬買債,收6厘息,1年收6萬,再將債券抵押五成加碼又收6厘息,減去借錢成本2厘,實收4厘,1年多收2萬 ($500,000 X 4%),即係100萬一共收8萬,年息8厘。收到嘅利息夠晒供樓,仲有錢落袋,兩位女士覺得點呢?」我為人謹慎,梗係會問清楚風險喇!下期再談。

讀者評論

發表留言