簡易趨勢投資法 李紫晶

0
164

上星期小勇哥深入淺出教識仁仔,投資要好好布局,用交通工具比喻不同資產,有不同速度和安全度抵達目的地。佢叫仁仔開一個年息1.6厘嘅活期戶口, 要時刻都有正回報,仁仔好醒目,將錢放喺佢大姐做樓按還款嘅戶口,資金收息等同按揭息口,依家有2厘年息,果然有我「你至精」嘅作風。

既然佢咁積極,小勇哥趁咖啡室人少少,繼續教投資布局第二步。「今日教你一個簡易趨勢投資法,源自Gary Antonacci嘅Dual Momentum Investing一書,書中有個名為Global Equity Momentum嘅交易模型,好啱初級投資者」。

小勇哥繼續講:「作者揀咗兩隻股票指數,分別係美國標普500指數,同埋MSCI世界不含美國指數,先做個別比較,睇吓現時嘅標普500指數與12個月前 嘅數值係升定跌,跟住比較現在嘅MSCI世界不含美國指數同12個月前嘅數值,然後喺兩隻指數之中,揀出升幅較大嗰隻指數,再同美國綜合債券指數做比較。 如果嗰隻股票指數升幅比美國債劵回報高,將所有資金買入追蹤嗰隻股票指數嘅ETF,否則將資金投入美國綜合債券指數ETF。如是者每月比較一次,以決定將 資金投放喺邊隻ETF內,簡單啲講係每月一次三揀一。」

仁仔消化片刻然後問:「老闆,這個交易模型看似簡單,唔知成效如何呢?」小勇哥回答:「人家用1971年嘅數據開始測試,直到現在都大幅跑贏指數,2004至2013年的回報每年有13.68%呢!你先了解一下,之後我哋再討論點樣運用。」

讀者評論

發表留言