建立個人交易系統 李紫晶

0
287

上期講到,小勇哥同仁仔決定用Global Equity Momentum(GEM相對動力投資法)做個Backtest,睇吓用喺港股嘅效果,佢哋揀咗盈富基金(2800)、另外再按作者嘅準則選擇與港股相關 度低的股票資產,今次用喺美國掛牌嘅環球股市ETF── iShares MSCI ACWI,避險唔用債券,用仁仔已安排好嘅兩厘港元活期存款。

由2014年1月開始,假設有100萬元在手,將盈富同ACWI兩隻ETF當月收市價同12個月前收盤價比較,如果升幅較多的一隻,比兩厘存款息高,就將所有資金買入嗰隻ETF,否則存錢入銀行,如是者每月比較一次,決定是否換馬。

結果喺2014年1到11月都揸環球股票,12月揸銀行存款,2015年1月到6月揸盈富,7月開始避險只持有存款。兩年來,用這個方法操作100萬倉,連同股息竟然有11%回報,而且兩年只須換馬三次,認真慳水慳力。

小勇哥最後同仁仔總結:「一個好的交易系統唔需要好複雜,最重要可以幫你認清趨勢,指示你如何上落車,好似GEM咁,最有價值的地方係提示投資者避開資產 暴跌嘅風險,如果用來做股市落馬指標,舊年7月將股票清倉,依家正好安安樂樂等入市。所以做一個優秀投資者,建立一個適合自己嘅交易系統,多做測試及不時 改良係好重要」。

紫晶心諗交易系統再好,都要人肯跟先得嘛,如果舊年6、7月冇走貨,依家隨時一球變半球噃,所以當小勇哥繼續講交易系統時,我忍唔住插嘴問,如果有人滿手蟹貨,又可以點做呢?下期繼續。

讀者評論

發表留言