期權一雞三味(一) 李紫晶

0
157

小勇哥見我問點樣處理蟹貨,狠狠瞪我一眼說:「李至精,你係咪揸住好多蟹貨?我記得舊年中有叫你走貨!」我急急澄清:「報告,我年中已將八成貨沽出,依家只有兩成持股,都係今次升市賺的,蟹貨係想幫讀者同姊妹問」。

小勇哥再問:「嗰兩成貨而家唔走又跌咗啦!係咪諗住個市會升番,盲目樂觀?」嘿!死人頭小勇果然咬住唔放,我惟有將自己嘅絕活講畀佢聽:「小勇哥,人家當然唔係盲目樂觀啦!你知我一向有內涵,玩開股票嘅人好難一股都無,我有招『期權一雞三味』可以用嚟應付現時情況」。

小勇哥嘲笑咁話:「嘖嘖嘖!仲一雞三味添,究竟係乜?」

紫晶馬上獻寶:「期權一雞三味嘅意思,係將正股轉為遠期『深入價內認購期權長倉』,即係Deep In the Money Long Call Option,套出嚟的錢可放喺銀行收息,同時每月做Covered Call賺期權金,直至正股公布派息,除淨前將期權轉番正股收息,咁一隻股票就可以賺到三種收入,包括股息、期權金同存款利息」。

難得小勇哥滿意收貨咁話:「唔錯,依你所講,1年應該超過10厘回報,你可以教姊妹們點樣具體操作,活化吓啲蟹貨,但首先可唔可以改個上得枱嘅名,例如期權三響炮、期權三弄呀?」

我馬上抗議,花巧並唔係我風格,務實才是我本色!具體操作,下期繼續。

讀者評論

發表留言