期權一雞三味 (二) 李紫晶

0
210

如果你好似紫晶咁喜歡買股收息,真係要學埋股票期權,因為回報可以係股息幾倍。睇開周四金曹Sir專欄都知期權分long call、short call、long put、short put四類,加埋不同行使價同埋行使日,用法千變萬化。今次睇吓紫晶呢招「期權一雞三味」啱唔啱各位口味?

紫晶舊年3月係31元附近買咗金沙中國(1928),貪佢派息同期權金都唔錯。不過,當時我唔係俾晒31元買正股,只係落訂,落訂就是買long call,仲要係遠期同深入價內(6月/行使價21元)。

點解?因為我想將落訂以外嘅錢放喺銀行收息,年息有兩厘呢!三分一嘅錢用嚟落訂,三分二存銀行收息。手上嘅long call因為深入價內,同正股冇大分別,冇乜溢價,升跌幅一樣。但long call收唔到股息,所以紫晶喺6月22日金沙除淨前行使long call,收1元股息。

行使期權換正股,唔使馬上真金白銀交收,翌日金沙除淨後,我將正股沽出轉番期權,未郁過銀行啲錢。今年2月4日金沙除淨派息0.99元,我照板煮碗。雖然咁做多了點買賣手續費,但比起只收息仍吸引。

現在上主菜,就係舊年3月到依家,紫晶做咗7次short call,每股共收約5元期權金,全年平均每月0.4元。Short call就係long call嘅相反,即係今次我唔係俾錢落訂,係收訂金,有錢落袋但有責任,要喺一個議定好的行使價同行使日交貨。

紫晶喜歡做短期1至2個月期short call ,仲要係最少兩個行使價的價外期權,因為期權金溢價高,貶值快。總之全年下來,我收咗7次期權金未試過交貨,聽起來不錯吧!下期計埋總回報同分析吓風險所在。

讀者評論

發表留言