贏家部署 李紫晶

0
113

仁仔見我呵欠連連咁走入咖啡室,十分八 卦咁問:「老板娘,昨晚冇炒美股咩,點解今日咁早落舖呀?」

紫晶掛住兩個熊貓眼袋同仁仔解釋:「股照炒、稿都要照寫呢!老編話,之前介紹讀者用期權處理蟹貨嘅方法,反應幾好,依家講完輸錢嘅人,順理要講吓舊年嘅贏家今年點部署喎!所以我一早落舖,想捉住退休Banker錢Sir、基金經理Raymond、小炒王勝哥等,問吓佢哋依排做緊乜,我知佢哋舊年贏唔少。唔好講咁多,你拿拿聲整杯Cappucino等我提提神先。」

10分鐘後,錢Sir拖住老婆施施然出現,紫晶馬上向佢請敎一番。錢Sir難得遇上知音,同我大談環球經濟形勢,然後講佢嘅理財哲學同埋投資部署。

小題:低配再高配

我將佢嘅見解濃縮再濃縮,佢話:「作為全球經濟4大巨頭,歐美日中依家相繼死火,個個又印銀紙又負利率救國,未來兩年經濟點會好?全球在衰退懸崖邊爭扎,我哋小市民嘅生活方向要跟大勢調整,檢視吓自己財務安全程度,即係收入是否穩定?負債會否過高?同時適當緊縮一吓支出,好似開舖嘅你要同業主傾吓減租。經濟繁榮時,我自己奉行低配生活模式,所謂低配,是指你有能力吃500元一頓晚餐,但只用300元。相反,日後市況進一步不景氣時,我又不妨放手享樂一吓,做個短期豪客,同太太多啲旅遊購物,所為賤物窮人,那時同樣嘅花費可換到更高享受呢!」

錢Sir果然係智者,唔怪得五十未到,已經可以退休,至於佢嘅投資部署,就要下期再續。

讀者評論

發表留言