安全高息股排行榜(一)李紫晶

0
714

上兩周紫晶搜羅全球房託,買咗3隻REIT ETF,包括東京掛牌嘅1345、澳洲嘅VAP、同埋美國新上市嘅SRET,最後呢一隻ETF專買全球100隻派息最高嘅REIT,年度化回報8.12厘,月月派息。

入完貨後,覺得自己好似去完環遊世界,買咗幾件喜愛嘅紀念品,感覺超爽!呢3件戰利品買完後都升咗,特別係VAP,買入後澳元兌美元升值1.7%,賺股價兼賺匯價,以後每月還有息收,你話爽唔爽?

選好股用10項財務數據

不過,依家係時候回歸香港,繼續建立我心目中嘅又安全又高息嘅股票倉,睇開我個欄嘅朋友都知道,呢個股息倉有兩個功能:其一當然係收息以提供現金流;其二係有朝一日槓桿咗嘅優質債券被call loan,我會放出股票用來補倉(雖然機會不大,但應有嘅風險管理還是必須的),所以選股高息之餘,還要夠安全。

小勇哥知道我嘅想法後,馬上送咗一本好書給我,書名叫The Little Book of Big Dividends。作者Charles Carlson認為,致富法門就是要投資那些股息豐厚,同時派息持續增長嘅股票。

佢利用10項財務數據(包括派息率、利息覆蓋率、現金流相對利盈比率等),制訂了一套評分準則--Big Save Dividend Scores,將標普1,500隻股票逐一評分,能獲取80至100分的公司,自然是經營穩健、派息理想,這些因素最終亦會令股價穩步上揚,到時便財息兼收。

紫晶打算將呢套選股準則,套用在香港1,800多隻股票上。唔知有邊啲股票會得高分呢?下星期話你知。

讀者評論

發表留言