李紫晶 理出個未來 【超級賭局大茶飯】

0
75

香港人喜歡賭博,現在你眼前有個超級賭局,要下注嗎?呢個賭局叫Brexit——6月23日英國脫歐公投,主動同被動參與者不計其數。除了英國人外,從事國際貿易、金融行業人士、擁有英國資產嘅人、留英學生、甚至揸住滙豐股票嘅散戶都受影響。雖然是賭大細,但勝在夠公平,無人能預知結果,我等散戶反而可以做好準備增加勝算。

等紫晶想想喺呢個賭局揭盅前後有咩好做?現時市場最一致嘅睇法係英國一旦脫歐,英鎊必然大跌,英國國家經濟社會研究報告認為,英鎊可以下跌兩成。相反若脫歐被否決,英鎊便能收復失地。英鎊走勢可以話完全受公投風向主導。

早排市場認為英國脫歐機會不斷增加,於是英鎊兌美元跌到7年低位,後來市場認為預測過於悲觀,英鎊又慢慢回升。但一日未公投,所有預測都是吹風,如果趁市場反應過度樂觀或悲觀時,反手開好倉或淡倉,勝算還是不俗的。

好似4月中英鎊連升一周有多,到5月又是做淡時機,過去兩個月紫晶就揸完又沽,沽完揸,來回各做了兩次,現時離公投尚餘六個星期,相信可以走多一兩轉。積極進取型嘅小勇哥更認為,這是吃大茶飯嘅機會,佢打算趁現在英鎊喺高低區間波動時,做齊一對期權long call 和long put,當英鎊跌至保力加通道底開期權long call,反彈至保力加通頂時再加個long put,整齊兩隻腳。

等到脫歐公投開估時,英鎊不但有方向,仲多數好波動,期權長倉都會佔盡優勢,到時就可將兩隻腳獲利平倉,在此預祝佢策略成功。

至於賭局揭盅後,又有咩好做?紫晶心目中都有幾個方案,下星期再同你分享。

讀者評論

發表留言