10厘回報的誘惑 李紫晶

0
373

上星期講梁太利用財技租樓,加按套咗啲錢出來投資,有10厘回報。問佢做乜投資?梁太話:「就係你上次介紹嗰隻大中華債券基金囉!3月時,分注買咗200萬,年息9.7厘,每月派息16,000。除咗收息,債價都升咗些少」。

紫晶:「可惜最近呢隻基金認講額度滿咗,暫停認購,惟有等佢重新開售後再考慮。唉!諗起舊年頭,搞南下基金嘅世兄問我每年投資目標回報幾多,我話十幾巴仙,佢非常不屑,話自己一日都做到啦!最近見佢,同樣問題同樣答案,佢居然話認真唔錯!」

梁太話:「咪係,連債王格羅斯都撰文話,從現在開始,投資新常態係低回報高波幅,3、4厘回報好正常,10厘一年簡直係誘惑!趁我仲有少少彈藥,不如你再去發掘吓有咩10厘回報嘅投資」。

紫晶:「好噃!等我問問身邊啲炒股幫、基金經理客仔,請佢哋每人提供一項能夠做到10厘穩定回報嘅投資建議,如有好料,下星期匯報。至於我自己,都係覺得今年做債券基金比較穩健,但唔想太重注喺一隻基金,我揀咗4隻債基,除咗有大中華債劵,仲有亞洲高收益債基(年息7.6厘)、環球高收益債基(年息6.6厘)、美國綜合債基(年息6.8厘)」。

她繼續講:「為咗提高回報,用少少心機,趁澳元、紐元、英鎊下跌時分注收集,再用這些外幣,認購前述基金嘅外幣對沖類別。利用匯價嘅優勢,可以做多兩厘回報,咁樣成個倉可以做到10厘。4隻基金都係每月派息,剛好分布喺每月嘅月頭、月中、月尾,我1個月可以出3次糧呢!」

讀者評論

發表留言