理出個未來 李紫晶 脫鈎世紀賭局賽後檢討

0
61

英國脫歐公投塵埃落定,相信令唔少大行banker大跌眼鏡,紫晶有個老友在公投前話,佢嘅銀行客戶經理極力推介做英鎊掛鈎存款,行使價1英鎊兌10.6港元,合約為期1年,年息4厘。即是英鎊1年後兌港元在10.6元以下,佢嘅定期款項將收取英鎊;如果在10.6元以上,佢啲港元便可收到4厘利息。

公投前,經理話銀行所有高層都睇英國繼續留歐,所以老友想收息的話,做呢個掛鈎存款好着數。經理仲叫老友用孖展信貸做大個金額,結果係點?大家都知道了。老友嘅心情當然難受,呢份合約仲要等成年先至完。

紫晶認為,現在黑天鵝通街飛,投資大行同埋博彩公司嘅盤口都唔準,我哋呢班小市民都係唔好玩偷步,或者好似5月時紫晶介紹小勇哥嘅做法,趁英鎊喺高低區間波動時,做齊一對期權long call和long put。

買齊認購認沽期權最賺錢

事後檢討,小勇哥嘅策略最成功,如果配合靈活走位,以英鎊最近一星期嘅波動情況睇,食完好倉,再食淡倉,再重覆做一轉都完全冇問題。所以如果朋友問做外幣掛鈎存款好唔好時,紫晶一律唔贊成,一來息率不太吸引;二來唔可以提早取消合約,倒不如花多些時間,學識掛鈎存款背後嘅期權操作,喺亂市時好似小勇哥咁,隨時開call開put咁先係上算。

至於紫晶之前訂嘅策略,係要英國脫歐,英鎊大跌時,買入英國政府債券(博英國推出刺激措施),或者用英鎊買入其他地區資產,又或者現在才開英鎊掛鈎存款,息率同贏面都會高好多。最好係英鎊、滙控(0005)、英國地產股等心水選擇,全部再跌一輪,紫晶便可以慢慢執平貨了。

讀者評論

發表留言