資產荒 加槓桿 李紫晶

0
38

近兩星期紫晶經常坐係咖啡室發愁,何解?咪係一向得心應手嘅資產配置遇到棘手問題──買唔到嘢。下半年紫晶原本諗住買多一兩手投資級別公司債,到期收益率只要求4厘多。

安全穩陣嘅選擇已經唔多,最終揀咗兩隻有中央國企背景嘅美元債券,居然等咗個多星期都冇放盤,幾球錢喺等待期間已經冇息收,十分不是味兒。這反映了各國大力量化寬鬆,投資者紛紛借平錢買資產,資產荒嘅情況非常嚴重。

加大槓桿追求更高回報

政府同企業債券收益率一再創新低,債券投資者為了追求多點回報,一係買更高息嘅垃圾債券;一係直接啲再借多啲平錢,加大槓桿。例如買完一手4厘息嘅債,用2厘成本按畀銀行再買多一手,咁好好醜醜都可以提高到6厘回報,所以債市出現回報愈低,愈要加大槓桿嘅惡性循環。

債市去到咁瘋狂嘅地步,相對地股市值博率又高番唔少,大量資金於是又重投股市,所以紫晶早兩星期講,下半年要逐步將股票配置增加至60%。不過,這輪股市升幅不是由業績帶動,又能維持幾耐呢?

極度化槓桿影子處處,去到樓市,發展商提供八成、九成按揭,有啲去到借款仲多過新樓嘅樓價,而且唔使入息證明。但呢啲優惠只限頭兩三年供款,3年後有啲發展商會加息口到5厘,到時冇入息證明嘅業主,要搵銀行轉按都好難,只好焗住捱貴息。如果連這批冇實力嘅購買力都消耗晒,加埋加息殺到,紫晶擔心樓價又跌過。

槓桿危機日深,所以對於紫晶買唔到資產嘅抱怨,坐在一旁嘅小勇哥打趣咁話: 「資產荒,不如食多塊豬肉乾!」即係乜都唔做,只作壁上觀。

讀者評論

發表留言