教育理財觀(一)李紫晶

0
25

香港家長生來一副勞碌命,為了子女學業,千金散盡亦在所不惜。今日咖啡室嘅清潔阿姨同我哭訴,話個仔唔生性,成日掛住上網唔肯用心讀書,佢月薪萬幾蚊,做到腰骨彎唔到,都唔捨得睇醫生,但每個月畀四、五千蚊個仔補習就眼都唔眨,最慘阿仔對讀書無興趣,補來補去成績都係科科紅,真係戥佢傷心兼肉痛。

另外有老友喺仔女一出世時,已經供定教育基金,等佢哋日後留學用,幾年學費連生活支出閒閒地兩三百萬,仲要啲仔女讀吓依樣讀吓嗰樣,廿幾三十歲人都仲倚賴緊屋企。從經濟角度睇,呢啲係資源錯配同浪費!

先訂立對子女的教育目標

紫晶同小勇哥都係為人父母,當然唔會吝嗇對子女嘅教育支出,不過同投資一樣,都唔會不問回報亂咁使。所謂回報,當然唔係指日後子女回饋多少金錢畀父母,而係哪些教育支出有利於完成我哋心目中嘅教育目標?紫晶嘅教育目標只是要求女兒長大後要獨立有主見、有社會責任感,同埋有國際視野,大學畢業後唔可以倚賴父母供養。

如果抱住呢個目標,就會識得點樣配置教育資源,唔會浪費同埋錯配。我們會安排女兒入讀國際學校,因為環境較易於培養獨立能力同埋國際視野。相反,補習費用完全可以慳番,因為補習唔會令女兒更獨立同埋更有責任感。所以各位勞碌嘅家長,為子女大灑金錢之餘,不如先諗吓自己對子女嘅教育目標。以目標為本,可以有更長遠嘅規劃,中學同大學安排都可以提早部署,預早籌備,下期續談。

讀者評論

發表留言