大圖看世界 李紫晶

0
36

上星期紫晶喺咖啡室邊歎咖啡邊睇財經周刊,見一本雜誌內有十幾個專欄同時推介滙豐(005),心諗滙豐已升到57、58元,而家先唱到成行成市,估計個市好快要調整。說時遲那時快,星期五美股大跌400點,再睇本報資金導航又話,債市大走資,睇嚟各項資產包括港股在內,要進入一個較像樣嘅調整。

當然,如果就咁決定出入市,實在有點兒戲,但以中長線資產配置作為投資方法而言,要掌握勝算也不是太難。最簡單嘅方法就是翻出金、股、匯、債、商品等各種資產的月線圖,互相比較,由於現在是資金市,可以好容易發現資金去咗邊搵食,邊個板塊贏面最大。現在趁調整,正好是入貨時機。

看過大圖後,確定7月份將資產比重由60%債券、30%股票、10%外匯同貴金屬逐步轉為30%債券、60%股票、10%外匯同貴金屬完全正確。股票方面要選哪些呢? MSCI已開發市場指數由2015年5月見頂後,至今仍在高位徘徊未能突破,漸見疲態。反觀,新興市場指數在2016年1月見底後一浪高於一浪,已突破降軌,加上已開發市場與新興市場股票估值比率,在08年以來創新低後剛回升,所以紫晶會在新興市場股票每次回調時加注,特別是中國同印度股票基金或ETF最多資金流入,作為中長線投資,點都要買些,港股拍住A股,今次回調都會加倉。

債市方面,反映信貸違約的CDS Index北美上周急升,有美國投資級別債券同埋高收益債券相信要走快啲。黃金同埋新興市場股票一樣,都是一浪高於一浪,一定要適量持有。原油見底後橫行未見方向、MSCI農產品指數快要破歷史高位,長線投資已有點遲,暫且觀望。從大圖看世界,是不是較容易作出投資決定呢?

讀者評論

發表留言