上月期權收割淨袋錢 李紫晶

0
51

上月四日,紫晶話港股急升幾個月需要調整,預計11月持續,建議用股票期權儲貨,9月尾Short Put金沙,行使價33元,每股收1.44元期權金,同時Long Put 行使價30元作保護。上星期五結算,金沙收34元,即係接唔到貨,期權金全數落袋。

做一對呢種有錢收嘅Short Put 加Long Put期權組合,英文叫Credit Spread,結果有兩種:一係收期權金唔駛接貨,好似今次咁;另一種係接貨,但成本因為有Long Put保護,所以同現貨價差唔多,即係輸有限。

由於風險可以自己控制,十分適合有正職嘅業餘投資者,好似紫晶要打理咖啡室,又要照顧子女,做期權Credit Spread增加收入來源最方便。即使金沙上月係33至36元區間不停震盪,一樣可以安心等待,唔駛經常望實個市。

金沙中長線仍值吸納

既然接唔到貨,現在分析吓是否11月再做金沙Credit Spread。記住,市況不斷變化,唔一定照辦煮碗,基本分析不可少。

首先,睇個股基本因素同埋周線圖,金沙中長線見底回升走勢未變,仍然值得吸納,但近期動力減弱,揀選Short Put行使價不宜太貼現貨價,好似上月做At the Money價位唔夠安全;第二,觀察大市走勢,大市轉弱比金沙更明顯,已屆22800主要支持位,如果大市唔好,大股難免受影響。

總結策略,紫晶先用一半注碼,開出略為價外33元行使價Short Put,每股收期權金0.9元,Long Put行使價29元作保護,支付期權金0.11元。如果金沙回落至33元時,再加注。月尾接貨抑或淨收期權金,到時再同大家滙報。

讀者評論

發表留言