配置自遊行(二) 李紫晶

0
39

老友黃太10月份賣咗兩層深圳樓,聽紫晶建議將部份錢轉買招商蛇口(深圳上市001979),今日佢好開心話要請我食飯:「你至精,你係我福星啊!我上星期睇你專欄20元賣咗隻招商蛇口,今日深股通一開,佢大跌得番17蚊,我又可以慢慢入番貨。」

紫晶不敢邀功:「都係你自己有行動力,我哋雖然係散戶,但投資時要擺脫散戶思維,如果等深港通開通先入貨,就好容易做大戶點心。又好似人民幣同英鎊已經跌咗一大截,唔通依家先諗放晒呢兩隻貨幣咩!倒不如睇吓可唔可以利用今次貨幣貶值機會,攞啲錢嚟投資。」

明年不動產考慮英國

「除咗上星期提到,用手上啲人仔做首期,以按揭形式購入內地二三線城市,沿着大型基建發展的商舖,係有利嘅方法,英鎊兌港元今年跌幅仲勁,超過15%,係36年嘅低位,處於兩個標準差以外嘅位置。中長線睇,滙價有九成半機會回升。2017年不動產資產配置,都可以考慮英國,日後就算資產唔升值,亦可以賺滙價。」

「滙率下跌,等於85折入貨,加上英國脫歐後為保經濟,就算唔減息都唔會輕易加息,無論息口趨跌或平穩,總好過美國逐步加息。而且未來幾年英國住房需求有增無減,其中有好多歐盟國家居民都趁英國未完成脫歐程序前,申請移民英國,我有幾個揸澳門葡國護照嘅朋友都話,依家趁英鎊低水,趕緊搞移民去英國, 近年中資機構同唔少港商都大舉投資英國房地產。」

醒目嘅黃太原來最近已去過唔少英國物業展銷會,佢報料話:「在英國置業可以按到七成,供25年,息口約3厘,而租金回報可達6至7%,有銀行甚至以還息唔還本嘅條款招徠客人,所以嗰啲展銷會好吸人氣,我都覺得英國地產可以看高一線。」

讀者評論

發表留言