借定息平錢 買股收息 李紫晶

0
100

今日係2017年首個交易日,紫晶祝各位投資者風生水起、一本萬利。坊間有說逢七係股災年,又有說17年為美股大牛市高峰,兩個極端會出現哪一個?企錯邊分分鐘會跌死人,唯有做好風險管理、控制注碼為上策。

息口趨勢已轉向,投資者現在應該係減少浮息和長期債務,但如果本身債務不高,反而可以仿效上市公司咁積極發債,仲要係永續債,借定啲平錢充實吓資本。

例如有銀行推出實際年利率低至0.93厘嘅稅貸,分分鐘係最後的廉價午餐,現在借多少,到股市回調時,分注買些派息穩定嘅股票,最好有5、6厘以上的大股,跟買樓一樣,當做按揭,先買後供,好過同人搶二、三百萬嘅車位。

小注買入新興市場ETF VWO

講番紫晶嘅資產配置標的,其中尚欠一隻亞洲新興市場股票ETF同一隻主動型股票基金。香港ETF因為交投太少,買賣差價太闊,還是選擇係美國上市嘅新興市場股票ETF較有利。

比較咗多隻ETF(EEM、IEMG、SCHE、BKF、GMM等),紫晶最終買入隻Vanguard FTSE Emerging Markets ETF(VWO),這個ETF資產規模430億美元,基金支出比率只是0.14%,每日平均交投6億美元。

VWO追踪富時新興市場指數,跟MSCI新興市場指數最大的分別是,沒有納入南韓股票,所以中國、台灣、印度、香港、泰國及馬來西亞這些亞洲國家的比重可以更高,達到65%。深度方面,既買大股亦買細股,今年有12.8%升幅,近三個月回調了3%,現時應該可以先入一注,作為中長線部署。

讀者評論

發表留言