以可虧損額釐定注碼 李紫晶

0
41

紫晶因在本欄執筆,有幸獲邀出席上周二晚舉行的《講股王2016頒奬典禮》,當晚衣香鬢影、股壇名人云集,大開眼界。以前覺得財經推介太多,不懂如何選擇,現在終於有一個公開選股比賽,讓股評人由年頭鬥至年尾,選出真正有料之士,對股民係一等一好事。原來股王潘鐵珊全年回報超過兩倍,真係唔簡單。今年比賽增加了資金管理的考驗,紫晶會喺app度,睇實幾位股王推介,縮窄尋寶範圍。

接番上星期所講,紫晶認為,每個投資者都要有自己的交易系統,以求心靜。交易系統都是用來解決以下四個問題:買什麼?買幾多?幾時買?幾時賣?先講買幾多,一般人買股前先睇吓自己有幾多錢,再決定買貨量,但紫晶會先諗自己可承受的虧損額,才決定買多少貨。一旦面臨損失,不會太肉痛,令自己寢食難安。

例如經常買賣的金沙中國(1928),現價每股32元,每手400股,一手即係12,800元,入貨前先問問自己,每手可以接受輸多少錢? 1000元、2000元還是更多?以整個持貨量計,又可以接受多大虧損?這些每個人的感受不同,所以說每名投資者都要有自己的交易系統。

假設可以容忍每手虧損2000元,同5萬元總虧損,50000÷2000=25手,即係可以用32萬買貨,約16%虧損仍能夠令自己從容面對,但前提是要對自己坦白,最好記錄在紙上計算,唔好賴貓同方便日後檢討。

因為這個5萬元是實實在在的一個具體銀碼,是你血汗的一部分,不是一個無關係的百分數或止蝕價,所以在分注入貨時,你會格外小心和清晰,如何分注入貨,紫晶下期再談。

順帶一提,11月尾本欄建議沽出招商蛇口(深圳A股001979),看似完成尋底,現價約17元人民幣,又可以開始收集。

讀者評論

發表留言