賺飛行里數全攻略 李紫晶

0
40

上兩周紫晶介紹用長實地產(1113)Set期權士碌架,當時話要分享結果:5月16日長地除淨前,紫晶以55.8元買正股,同時開12月到期、55元行使價嘅Covered Call,每股收3.2元期權金。5月15日長地收56.3元,55元Covered Call屬輕微價內,一如所料,當日隻Call冇被行使。

換言之,紫晶收到1.15元股息同埋2.4元期權金,仲保留咗正股。8個月基本回報6.5厘,正股成本價降至52.25元。之後如何操作?首要睇住正股走勢,或加倉或Short Put、Short Call,總之長玩長有。

除了發掘雙優資產外,紫晶近排花了不少時間,研究如何賺飛行里數。事緣上個月去完英國回來,發覺搭長途機坐經濟客位,真係好辛苦!人到中年要對自己好啲,所以認真去了解點樣賺飛行里數,用最抵價坐商務客位。如果一家三口坐商務客位去倫敦,正價要11、12萬,用里數換只需36萬里,慳好多錢呢!

首先,紫晶開了某大銀行(編輯話唔開得真名)可以換飛行里數嘅信用卡,4至6元消費兌換一公里,算係坊間最高兌換率。咁啱紫晶喺呢間銀行有理財戶口,可以將存款同樓宇貸款結餘兌換里數,呢樣就比較特別。

再進一步,將經常用嘅八達通卡,轉去呢張卡做自動增值,平時細項支出都可以儲積分賺里數。平時去超市、汽車入油等,記住用這些商戶嘅積分卡儲分,原來部分商戶嘅積分卡都可以換里數,所以信用卡結賬賺里數之餘,仲可以透過個別商戶積分卡,賺多一轉飛行里數。

如果用呢張卡,交水、電、煤、差餉、物業管理費等支出,係唔可以賺取積分,所以這些支出就要用另一張中資行發出嘅信用卡,每15元換一里。最後將屋企人同自己另一張八達通卡,用呢間中資行信用卡,做自動增值。咁就90%家庭開支都可以換里數,每年慳番十幾萬,條數都唔細,理財路上,節流都好重要啊!

值得一提,如果以餐飲、旅遊及百貨公司支出計,同埋當月簽賬超過$15,000,呢間中資行嘅另一張信用卡係3元換一公里。

讀者評論

發表留言