股場如商場 李紫晶

0
18

今早見到地產代理蘇小姐嬲爆爆,問佢乜事,原來佢賣咗層樓,套咗啲錢來玩吓股票。最近細價股股災令佢損失不少,佢大力吐槽:「港交所本來好似個高級購物商場,但近年納入的商戶(上市公司)質素愈來愈低,商品種類缺乏新意(新經濟產業),仲龍蛇混集,任由一些黑店(老千股)揾食,唔怪得同十幾年前相比,街客(散戶)生意由五成得番唔夠兩成! 如果唔係仲有十多間明星商戶坐陣,真係揾鬼幫襯!」

紫晶失笑話:「蘇小姐,你個比喻又幾貼切噃,睇來個場主同保安(証監會)要積極做啲嘢,先可以挽回顧客嘅信心了。不過,呢個商場唔好玩,我哋可以去另一個場玩。 去A場(A股市場)見識吓都好,A場商戶數目多幾倍,新經濟行業選擇多。雖然宜家出入商場有限制,唔可以來去自如,但如果我哋早人一點入去參觀,發掘吓啲好貨,唔好等第日個場自由出入,同人搶貨。」
「紫晶有朋友係大陸開證券行,佢話自2015年A股股災後,現在內地散戶還未恢復信心,証券行大都冷冷清清,所以內外形勢都對中長線投資者有利,正好慢慢發掘寶藏,估計明年都可以開始收成。紫晶現時手上只有一隻招商蛇口(001979.SZ),是長揸的優質資產,下半年打算慢慢建立一個優質A股倉。現時最心儀的板塊是基因測序行業,係中國快速發展的新興領域,同時係阿爺眼中有戰略性地位的產業。 」

「現時A股市場中,與基因測序相關的公司有達安基因(002030.SZ)、百傲科技(430353.OC)、之江生物(834839.OC),但好戲在後頭,基因測序行業的龍頭公司華大基因(300676.SZ)快將在深圳創業板上市。呢間公司是全國最大基因組學研發機構,2014、15、16年收入分別為11.3、13.2、17.1億元,同比分別增長8%、16.5%、29.8%。2016年純利3.33億元增長27%。雖然現時港人唔可以透過深港通買賣深圳創業板股票,但法例其實容許在國內生活或工作的港澳台居民在國內開設証券戶口,聰明的香港人自會安排。」

讀者評論

發表留言