長實地產股債之爭 李紫晶

0
102

以下是一對中年夫婦為投資理財而爭辯的對話

女:「我留意到長實地產(1113)發行的永續債券,穆迪A2評級,票面息率4.6厘,但最近債價跌到97元,孳息率去到4.73厘,我想入番手,你話好唔好?」

男:「梗係唔好啦,依家買長地正股派息都有2.5厘,我哋再做埋Covered Call 收期權金,加起來都唔止5厘回報,仲有機會賺埋股價,着數過買債收息啦!況且永續債流通量唔高,要出售可能有難度」。

女:「但股票波幅高好多,尤其是隻股由年初48元升到現在62元,升幅有三成,風險都高咗好多,現在不宜加大注,同時仲要睇實個市,以防大幅回吐」。

男:「雖然長地已經升咗好多,但佢哋自己有錢都唔贖回啲債,選擇積極回購股份,咁即係話公司本身都認為自己隻股票現價比債券吸引,我哋要參考吓公司管理層嘅選擇」。

女:「無錯股票有機會回報高些,但我們不能只看回報,而過份將資產集中在股市。適當地配置高級別債券可以平衡組合嘅波動性。我估計,如果今年下半年股市出現較深度調整,因為避險原因,呢條債有機會上番100元樓上,到時我們可以賺價食糊,如果賺唔到價,可以一路收息,保本而有4.7厘的回報,都係唔錯嘅」。

男:「現在息口趨勢向上,債價可能仲有得跌,現時出手似乎太早」。

女:「乜唔係話耶倫已經放鴿,加息空間不會太大,債價應該已差不多反映現況咩……」

無錯,以上就是紫晶與小勇哥今早爭論嘅內容,尚未有結論,估計要進入第二論談判,不知各位讀者又何看法呢?

讀者評論

發表留言