如何建立A股的成長股倉 小勇哥

0
14

紫晶同我都睇好明年嘅A股市場,依家開始密密建立倉位。佢負責篩選大盤股,為組合提供穩定回報;我就負責揀一批成長股,博有以倍數計嘅賺幅。我會根據一啲原則揀選成長股,今日先講點揀股。

我睇成長股有兩種:一種係依家盈利有高增長,未來將維持呢個幅度,甚至提速;另一種較極端,企業本身可能無盈利,但身處市場夠大,並且做到winner takes all(贏家通吃)嘅王者。

前一種能見度高啲,比較易睇;後一種難揀,一係人人都知,已經炒貴晒,好似騰訊咁;一係前景好好,但依家只係其中贏家嘅後選人之一,屬高風險高回報。

先講第一種成長股,首先睇行業,如果行業係朝陽行業,成長性較確定,尤其係有國家政策支持更可靠;其次係企業本身要有成長條件,例如產品、技術等有極大優勢。最後當然係買入價合理,最好係偏低,但機會極少。

簡單講,即係行業、公司、價格都要好。好行業係現時處於高速增長期,並且可持續3至5年,例如製造業及消費業嘅產業升級,呢兩個係中國經濟及社會結構轉型嘅大方向,估計持續10年以上。

呢兩年,中國頒佈咗唔少關於製造業升級嘅政策。中國要提高製造業嘅科技創新水平,以下行業將受惠,包括汽車、高端裝備、航空、軌道交通、機床同埋安防。消費升級方面,將集中B2C跨境電商、旅遊、電影或演藝,同埋體育。

至於好公司點揀?我會睇細分行業嘅龍頭股,通常呢類股票業績亮麗,收入同純利增長率較高,至少20%或以上。好價格即係估值合理,我會用PEG而唔用PE(市盈率)。

PEG即係市盈率相對盈利增長嘅比率,公式係用市盈率除以盈利增長速度。PEG既可睇到目前財務狀況,又睇到未來一段時期嘅增長預期。PEG等如1代表估值合理,數值越細,代表越平。

今次講咗揀股建倉嘅方法,下次我哋講成長股名單。

讀者評論

發表留言