買九倉 一箭三鵰 小勇哥

0
28

小勇哥:「你至精,你呢個星期六搞咗個讀者分享會,有冇準備啲乜好嘢,回饋下讀者嘅支持?」

紫晶:「當然有啦!你唔見我依家密密籌劃緊2018年資產配置嘅組合名單,諗住同在場嘅讀者分享。你睇睇,特別係呢隻股票,市帳率0.6倍,市盈率低過11倍,穩定派息4厘,去年營業額同純利都有雙位數字增長,仲有重組業務嘅可能,實在可以中長線投資,你話係唔係?」

小勇哥:「呢隻唔錯,我最近都睇中咗隻重組緊嘅藍籌股九龍倉(004),好值得大注做下正股同埋期權。」

紫晶:「真係咁好,講個劇情嚟聽吓!」

小勇哥:「自從李嘉誠家族2015年初開始重組上市王國,旗下公司市值膨脹咗,與資產淨值嘅折讓收窄咗,誠哥家族財富又多咗。其他富豪都唔執輸,鄭裕彤家族嘅新世界發展(017),3年前私有化新世界中國(917)失敗,去年捲土重來,成功私有化咗新中,今年再接再厲,想私有化新世界百貨(825)但衰咗。」

小勇哥繼續講:「今年輪到吳光正家族。九龍倉(004)喺4月拒絕為有線寬頻(1097)供股,將權利轉咗畀永升集團,咁就將蝕錢業務甩咗,跟住九倉仲將手上嘅有線股份派晒畀股東。上個月初,九倉宣佈,將持有海港城、時代廣場呢類香港優質物業嘅九龍倉置業,實物方式派晒畀股東,跟住用介紹形式,喺主板上市。」

紫晶:「咁做又乜好處先?」

小勇哥:「吳光正家族連環兩招,可以提升九倉嘅估值。九倉截到6月底嘅資產淨值有3245億元,每股NAV有106.9元,股價嘅折讓率有32%。會德豐(020)由於係九倉嘅控股公司,折讓率仲高,去到48%。重組後,兩隻股嘅資產淨值同股價嘅折讓率可以收窄。」

「九倉置業已經交咗上市申請,由於係介紹形式,加上藍籌股賬目肯定清清楚楚,上市唔駛好耐。九倉已經講咗,1股九倉送1股九倉置業。買一隻九倉,可以一箭雙鵰,先攞有線股份;再收九倉置業股份,真係諗得過。而且,我相信吳光正家族重組計劃仍然有後着,買九倉嘅着數可能仲多。」篇幅有限,下次再談。

讀者評論

發表留言