買九倉 一箭三鵰(二) 小勇哥

0
46

小勇哥:「你至精,前日個讀者分享會,覺得點呢?」

紫晶:「好開心!原本兩個鐘嘅分享會,因為大家傾得好熱烈,差唔多傾多一個鐘,應承咗要畀讀者嘅嘢都做到,好似上次你話會講九倉嘅部署,出席嘅讀者已經收到,不過其他讀者仲未知,你快啲係度講埋佢喇!」

小勇哥:「上次講到九龍倉分拆持有香港收租物業嘅九龍倉置業上市,仲會將股份派晒畀股東,呢件事相信喺今年內完成,由依家到分拆成功嘅期間,消息會少啲,但係身為九倉股東,眼前要做嘅係記得收埋有線寬頻嘅股份。」

紫晶:「有線嘅股份咪啱啱派咗囉?!」

小勇哥:「有線股份係分兩批派發,上次100股九倉派48.91791股有線,第二批數量少啲,100股九倉派 27.731359股有線。記得星期四就除權,唔好見九倉無乜新聞消息就沽咗佢。」

紫晶:「明白!另外上次你話買九倉係一箭三鵰,收到有線同埋九倉置業嘅股份都係一開二啫,第三究竟係乜?」

小勇哥:「吳光正有一仔一女,個女做零售,個仔做物業,佢已經安排好。依家九倉將通訊媒體業務賣走晒,又將收租業務拆出嚟,我相信係為咗鞏固家族嘅控制權。大家都知九倉最值錢嘅係海港城同埋時代廣場。分拆咗獨立上市後,都要將股份派晒畀股東,係因為家族直接持有嘅公司係會德豐,由會德豐直接持有九倉置業,咁就唔怕個仔將來畀人狙擊。」

「至於原本嘅九倉最好係同會德豐合併,一來大陸嘅收租業務陸續落成,呢啲mini版海港城都係金蛋,最好直接持有;二來九倉分拆九倉置業,會收到九倉置業124億元股息,同埋還番250億元畀九倉,分拆後嘅九倉有630億cash。會德豐自己有嘅cash只得幾十億,如果同九倉合併咗就會有大把cash,買地起樓就順手得多。」

紫晶:「咁即係話會德豐同九倉合併呢個機會就係第三鵰,"錢"途光明喎,一於逢低吸納,71元左右買正股,另開10月期權Covered Call,行使價75元,邊等邊賺期權金,或者開貼價10月Short Put,行使價72.5元,睇下可唔可以再平啲入到貨。」

讀者評論

發表留言