期權小舖頭 李紫晶

0
50

唔少朋友都同紫晶講過,想過開間舖頭,自己話事做老板,一嘗自主嘅樂趣。幻想總是美好,現實卻是殘酷。當我同老友們講,你唔好以為隔離茶餐廳生意好,做老板就好過癮,原來老板十年如一日,四點鐘起床開舖,唔係個個都頂得順。

話說紫晶未夠10歲已經喺爸媽嘅舖頭幫手,30多年看舖經驗,從小食店、水果店、家品店、時裝店到咖啡室,總結咗一啲經營店舖嘅心得,發覺原來運用喺股票期權上,可以好似經營小店一樣,帶嚟穩定收入。

因此,在打擊朋友之餘,紫晶都會俾番一個有建設性嘅提議,游說老友們喺開舖之前,不如先利用股票期權,實習一吓入貨技巧、存貨、現金流同埋風險營理等,話唔定將來直接把股票期權,當做一門生意咁發展。

首先,我會建議朋友做一個開業預算,包括投資金額、預計支出、營利目標、能夠投放多少時間等。要知道,期權小舖頭同實體店一樣,都要投放相當程度的時間,唔可以做個無影老闆。如果真係冇時間打理,我會建議佢轉做期權收租佬(日後再介紹這種期權投資方法)。

訂咗開業預算後,便要學習入貨技巧。股票期權能夠當做一門生意咁營運,原因係可以全天候操作,不論升市、跌市或牛皮市,都可以有賺錢嘅方法,唔似買賣股票,只可以買單邊升或跌,而沽空喺香港嘅股市,係高難度動作,成本亦高。

股票期權要以舖頭形式操作,第一要點是貨如輪轉,股票此時只是一件貨物,不是一件等待升值的資產,所以只要那隻股票能夠帶來合理嘅期權金回報,我們係好高興將佢賣出,而不會可惜那隻股票賣出後繼續攀升。

正如一間實體店,生意建基於暢銷的貨品,越多貨品暢銷,便能賺到越多利潤,除非是經營古董店,又唔等錢開飯,否則一定要認清市場受歡迎的產品,考考自己入貨的眼光,才能做到貨如輪轉。

做期權小舖頭,與實體店最唔同嘅地方是,不用理會行銷推廣和顧客服務這兩瓣,營運模式已經是最節省和簡單,有志做生意的朋友,不妨先以此方法鍛鍊一下身手。紫晶打算10月中開設一次期權小舖頭的實習課程,睇下會唔會吸引到一些喜愛股票期權的朋友。如有興趣參加,請在「李紫晶與小勇哥」或「講股王」facebook專頁表示興趣。

讀者評論

發表留言