複製長建神話 長實諗得過 李紫晶

0
44

由於忙於搬家,上星期專欄暫停一次。之前紫晶講開因為歐洲經濟有起色,開始配置歐洲資產,除咗貪便宜慢慢收集徳銀(DB.NYSE)外,仲揀咗隻房地產信託──IREIT Global(UD1U.SGX)用嚟收息。

揀IREIT Global的理由是,如果英國硬脫歐,導致大企業遷至德國,對德國商用物業市場有利。IREIT Global是首家在新加坡上市而投資歐洲地產的REIT,組合內5項物業都在德國,包括Berlin Campus、Bonn Campus、Darmsadt Campus等商業及停車場項目。

IREIT Global股本回報率不俗,有9.3%。派息7.6厘,高於平均值5.4厘,現價每單位0.765坡幣,等同1.1倍PB和12倍PE,不算超值,但尚算合理。再看看物業出租率均超過九成,長期租客有大型電訊商、退休基金公司、保險公司等,未來幾年租金回報穩定。

唯一美中不足的是,今年坡幣升幅已大,並且開始回落,所以買賣要注意匯價,紫晶的操作是先以美元買入REIT,等坡幣進一步回落時,才換滙找數。講開房地產,小勇哥之前力推九龍倉(004),上周五喺我哋主持嘅Yahoo Money Talk節目,佢又推介地產股──長江實業(1113)。

首富李嘉誠嘅長和系王國自2015年開始大重組,先將原本長實同和黃嘅母子關係,轉變為姐妹關係,仲連名稱都改埋,由家族直接持有各自的30%。表面睇,重組目的係將和黃地產業務歸入長實;同埋由李家直接持有原和黃業務,即係長江地產(1113,現稱長江實業)負責地產;長和實業(001)負責地產以外業務。

不過,自從2015年底長江基建(1038)同電能實業(006)合併計劃畀股東否決後,長江實業開始減少地產,進軍基建業務,現已參與能源、飛機租賃、建築設備等。最新發展是以402億元出售中環中心75%權益,成為淨現金公司。

長和系有4家公司做基建,包括長實、長建、電能及港燈(2638)。除了港燈專注香港電力外,其餘3家業務重叠。小勇哥覺得,長實逐漸變成基建股,比起地產股身份,估值有提升空間。其次,李家王國重組基建業務機會不低,現金最多嘅長實最值得諗。

讀者評論

發表留言